P150K naghuhulat ha scholars han organic agri farming

Published on: February 08, 2023

By: Tacloban CIO

TACLOBAN CITY - Maabot P5,000 kada bolan nga stipend ngan P150,000 nga starting capital ha pag-um in naghuhulat ha magigin palaran nga makasulod han siyam (9) ka bolan nga Organic Agriculture Youth Internship Program para hin moderno nga pag-uma ngan panagat o fisheries.

Ha bug-os nga training season, an mga estudyante in libre hin accommodation o pag-uukyan ngada hiton pakatapos han siyam (9) ka bolan ngan an makakagradwar in tatagan pa hin tag P10,000 kada bolan ha sulod hin duha (2) ka tuig.

Sumala kan Tacloban City Agriculturist Romelo T. Anade, dida han Enero 27, 2023, binuhat ha City Engineers Office Gym and information caravan para hini nga gin-atenderan han agriculturists ug iba pa nga tinaglawas han kada local government unit (LGU) nga ira liwat igpapasamwak haira tagsa tagsa nga siyudad ug bungto komo hira an gintuinan nga magsara (screen) han mga aplikante.

Ini nga programa in pinananagbalayan han Agriculture Training Institute (ATI) Regional training Center nga nakabase ha Visayas State University (VSU) ha Baybay City, Leyte.

Na edad hin 18-35 anyos an pwede mag-apply hini nga may gugma para han pag-uma bisan pa man kun may asawa, single parent, Out of School Youth (OSY), In School Youth o naeskwela na nga daan.

An mga interesado in makadto la ha buhatan han Agriculturist Office ha siyudad o bungto nga ira gin-uukyan ha sulod han Rehiyon 8 para magpailarom hin screening. Pebrero 12 an deadline pangarawat han mga aplikante.

Para han mga taga-Tacloban, makadto hira ha City Agriculturist Office ha dalan Justice Romualdez- sapit gudla han City Engineers Office Gym.

An mga mapipili para hini nga Organic Agriculture Youth Internship and Fisheries Program in aadto magha-hands on training ha mga identified ngan Certified Farming Training Centers han Region 8 diin an iba hini in aanhi ha siyudad han Tacloban para han siyam ka bolan nga training.

Sumala pa kan Anade, hiton Marso na magtitikang an training diin panuyo hini nga programa nga makapundar hin bag-o ngan mga batan-on nga henerasyon hin mga mag-uroma kay an agrikultura duro hin ka importante nga sektor han ekonomiya hiton nasud ngan han kalibutan nga asya an naghahatag han supply han mga pagkaon ha mga merkado para may kaunon an mga tawo. (Tacloban CIO)